Двата гиганти од Манчестер, Сити и Јунајтед, се во директна трка за потписот на младата надеж на Вест Хем, Матеуш Фернандеш, пренесуваат англиските медиуми. 21-годишниот португалски играч за врска е еден од ретките светли моменти во тимот на „чеканите“ во тековната тешка сезона.
Ситуацијата околу талентираниот фудбалер станува сè потензична, бидејќи Вест Хем е сериозно загрозен од испаѓање. Според извори, во договорот на Фернандеш постои клаузула за откуп во случај на испаѓање во Чемпионшип, што го активираше интересот на елитните клубови.
Двата клуба од Манчестер внимателно го следат развојот на играчот, гледајќи во него долгорочен проект со огромен потенцијал.
Вест Хем се наоѓа пред тежок избор. „Чеканите“ можат да се согласат на продажба уште во јануари, за да добијат повисока сума, наместо да ризикуваат да го загубат за многу помалку пари во летото доколку испаднат.
Матеуш Фернандеш е еден од најконстантните играчи за менаџерот Нуно Еспирито Санто, започнувајќи како стартер во 19 од своите 20 натпревари во Премиер – лигата, забележувајќи два гола и две асистенции.
Иако Фернандеш е клучен за опстанокот на тимот, финансискиот ризик при евентуално испаѓање може да го натера раководството да се раздели со него порано. Неговата флексибилност на теренот и конзистентност го направија еден од најатрактивните млади играчи кој игра во тим надвор од водечките шест клуба во Англија.
