Во првиот натпревар од полуфиналето на Купот на кралот на „Ванда Метрополитано“, Атлетико Мадрид ја декласираше Барселона со 4-0 и со голема предност ќе патува на реваншот на „Камп Ноу“. Сите голови беа постигнати во првото полувреме, кога тимот на Диего Симеоне доминираше.
Мечот беше одбележан и со голема грешка на Жоан Гарсија на самиот старт, како и со спорниот гол на Барселона кој подоцна беше поништен по најдолгата ВАР-проверка во последно време, која траеше дури осум минути.
Уште во третата минута Атлетико имаше голема шанса. Антоан Гризман со фантастичен потег ја заобиколи целата одбрана на Барселона, а Симеоне се најде во ситуација еден на еден со голманот Гарсија, но не успеа веднаш да ја заврши акцијата.
Во шестата минута следеше чуден момент. По грешка на Ерик Гарсија, топката му помина под ногата на Жоан Гарсија и ја премина гол линијата. Судиската одлука беше автогол, иако подоцна по ВАР-интервенција Лукман беше евидентиран како стрелец.
Атлетико продолжи да го контролира мечот, а Гризман во 14. минута го зголеми водството на 2-0. По корнер на Барселона, голманот Мусо совршено ја прати топката до Лукман, која преку неколку додавања стигна до Гризман, а тој рутински ја прати низ нозете на Кунде директно во мрежата.
Барселона имаше шанса во 20. минута кога Фермин Лопез погоди греда.
Во 33. минута беше 3-0. Брзи комбинации преку десната страна доведоа до несебично додавање од Алварез до Лукман, кој не погреши. Флик реагираше и во 37. минута го внесе Левандовски, но Барселона не успеа да го промени текот на мечот.
Во завршницата на полувремето, Атлетико стигна и до четвртиот гол. Симеоне повторно ја користеше десната страна, Лукман додаде до Алварез, а Аргентинецот ја заврши акцијата со погодок.
На стартот на второто полувреме Фермин имаше нова шанса, но Мусо повторно беше одличен на голот.
Во 52. минута Барселона постигна гол преку Кубарси, но по осум минути ВАР-проверка, судијата го поништи погодокот поради минимален офсајд.
На крајот, Барселона остана со играч помалку откако Ерик Гарсија доби црвен картон во 84. минута по груб старт врз Баена.
