Женската фудбалска репрезентација на Македонија со пораз го затвори квалификацискиот циклус за Светското првенство, откако во Битола загуби од Азербејџан со 1-3 во директната пресметка за второто место во групата 3 од Лигата Ц.
Нашите репрезентативки не успеаја да го искористат домашниот терен и на крајот мораа да му честитаат на противникот, кој со триумфот го обезбеди второто место на табелата и продолжување на квалификацискиот пат. Македонија циклусот го заврши на третата позиција со шест освоени бода, зад Азербејџан и првопласираната Унгарија. Единствените две победи избраничките на Александар Андов ги забележаа против селекцијата на Андора.
Гостинките уште од самиот почеток покажаа поголема иницијатива и конкретност. Азербејџан поведе уште во осмата минута, но Македонија брзо возврати преку Мустафа, која само три минути подоцна донесе израмнување на 1-1. Сепак, до заминувањето на одмор гостинките уште двапати ја затресоа мрежата и создадоа предност која подоцна успешно ја сочуваа до последниот судиски свиреж.
Во текот на целиот натпревар Азербејџан делуваше поорганизирано и поопасно во нападот, па заслужено стигна до бодовите што му беа потребни за пласман пред Македонија на табелата.
Покрај резултатското значење, средбата во Битола ќе остане запаметена и по емотивниот момент поврзан со капитенката Викторија Панчурова. Долгогодишната чуварка на мрежата за последен пат го носеше дресот со државниот грб и официјално стави крај на својата репрезентативна кариера, оставајќи значаен белег во македонскиот женски фудбал.
