Неочекуван пресврт го одбележа враќањето на Фенербахче во Лигата на шампионите. Само по еден натпревар во елитното европско натпреварување, тренерот Исмаил Картал објави дека си поднесува оставка, но претседателот на клубот Азиз Јилдирим експресно ја одби неговата одлука.
Фенербахче вчера го одигра првиот натпревар во Лигата на шампионите по подолга пауза, а на домашен терен ремизираше 1-1 против Рома. Иако резултатот не беше поразителен, по мечот Картал изненадувачки соопшти дека повеќе нема да го води тимот.
„Им честитам на моите фудбалери за вечерашниот натпревар, но поднесувам оставка од мојата позиција“, изјави Картал на прес-конференцијата.
Тој објасни дека одлуката ја донел со намера да му овозможи на клубот да продолжи во друга насока.
„Ја донесов оваа одлука за да направам пат за мојот клуб. Како тим ја донесовме оваа одлука заедно.“
Картал отиде и чекор подалеку, нагласувајќи дека неговата намера е трајно да се повлече од клупата на Фенербахче.
„За да му помогнам на Фенербахче, на моите фудбалери и на тренерите кои ќе дојдат во иднина, поднесувам оставка со намера никогаш повеќе да не се вратам.“
Сепак, неговата оставка засега не произведе никакви последици. Претседателот Азиз Јилдирим јасно стави до знаење дека не ја прифаќа одлуката и дека Картал останува тренер на тимот.
„Исмаил Картал сè уште е тренер на Фенербахче. Клубот треба да му даде целосна поддршка. Додека јас сум претседател, Исмаил Картал ќе биде тренер на Фенербахче“, порача Јилдирим.
Картал на клупата на турскиот гигант пристигна во јуни, но по само неколку месеци неговата иднина стана главна тема во клубот. Тој поднесе оставка затоа што по завршувањето на мечот кон него фрлиле со шише од публиката, но престапникот е уапсен, а Картал ја доби поддршката од клубот.
