Амбициозниот проект на Комо би можел да добие уште едно звучно засилување, откако италијанскиот клуб покажува сериозен интерес за досегашниот капитен на Реал Мадрид, Даниел Карвахал. Тренерот Сеск Фабрегас сака да внесе дополнително искуство и квалитет во составот пред историскиот настап на тимот во Лигата на шампионите.
Добрите односи меѓу Реал Мадрид и Комо би можеле да резултираат со нова зделка ова лето. Покрај Карвахал, клубот од Италија внимателно ги следи и младите фудбалери на „кралскиот клуб“, 22-годишниот напаѓач Гонзало Гарсија и 21-годишниот талент Сезар Паласиос.
Комо се подготвува за можното заминување на Нико Пас, па раководството активно работи на засилувања во повеќе позиции.
Фабрегас е заинтересиран токму Карвахал да биде еден од носителите на проектот, особено откако искусниот десен бек потврди дека ќе го напушти Реал Мадрид како слободен агент.
Иако интерес за 34-годишниот дефанзивец не недостасува, Комо може да му понуди можност да остане на највисокото европско ниво и да настапува во Лигата на шампионите. Во клубот веруваат дека неговото искуство и лидерски квалитети би биле од огромно значење за тим кој допрва гради репутација на европската сцена.
Со комбинирање на искусни имиња и млади таленти, Комо продолжува со амбициозната трансфер политика, а евентуалното доаѓање на Карвахал би претставувало едно од најголемите засилувања во клупската историја.
