Џанлуиџи Донарума и официјално стави крај на својата авантура во ПСЖ, испраќајќи емотивна порака до навивачите и потврдувајќи дека кариерата ќе ја продолжи во друг клуб. Италијанскиот голман заминува во неочекуван момент, само неколку месеци по освојувањето на Лигата на шампионите.
„Од првиот ден дадов сè, на теренот и надвор од него, за да го заслужам моето место и да го бранам голот на ПСЖ. За жал, некој одлучи дека повеќе нема да бидам дел од тимот. Се надевам дека ќе имам можност лично да се збогувам со навивачите. Ваша поддршка ми значеше сè, а спомените од магичните ноќи на ‘Паркот на принцовите’ ќе ги носам засекогаш“, напиша Донарума.
Тој се заблагодари и на соиграчите, нарекувајќи ги „второ семејство“ и истакна дека играњето за клубот и животот во Париз биле огромна чест.
Донарума пристигна во ПСЖ во 2021 година од Милан и во изминатите три сезони освои повеќе трофеи, вклучително и Лигата на шампионите, оставајќи силен белег во францускиот гигант.
