Мајкл Олисе испиша историја на Светското првенство 2026, откако го надмина рекордот на легендарниот Пеле за најмногу асистенции на еден Мундијал.
Францускиот репрезентативец запиша седум асистенции на турнирот и го надмина достигнувањето на Пеле од Светското првенство во 1970 година, кога бразилската легенда имаше шест големи додавања. Статистиката на „Опта“ за светските првенства се следи од Мундијалот во 1966 година.
И покрај тоа што Франција не успеа да стигне до финалето, Олисе имаше фантастичен турнир и го забележа третото најдобро остварување по број на асистенции во историјата на Светските првенства.
Пред него на вечната листа се само Рајмон Копа, кој имаше осум асистенции на Мундијалот во 1958 година, и Фриц Валтер со осум асистенции на Светското првенство во 1954 година.
Уште поимпресивен е податокот дека пет од седумте асистенции на Олисе беа наменети за Килијан Мбапе. Тоа е рекорд за најмногу голови создадени од еден играч за друг во рамките на едно Светско првенство во периодот што го опфаќа статистиката на „Опта“.
На Светското првенство 2026 останува да се одигра уште само еден натпревар. Вечерва, 19 јули, од 21 часот по македонско време, Аргентина и Шпанија ќе се соочат во големото финале за светската титула.
