Страстите околу Мохамед Салах и неговиот статус во Ливерпул не стивнуваат и ситуацијата е на работ да ескалира. Египќанецот веќе три натпревари по ред почнува на клупата, со само едно кратко влегување во игра — а кулминацијата стигна против Лидс, меч што „црвените“ го завршија 3-3, додека Салах цело време беше загреан, но заборавен.
По натпреварот, Салах не молчеше.
„Се чувствувам како да ме фрлиле под автобус. Како некој намерно да ме направи виновен“, изјави тој — порака што брзо одекна на „Енфилд“.
Навивачите веднаш застанаа зад својата ѕвезда и многумина очекуваа Арне Слот да ја плати цената. Но, сценариото оди во сосема поинаква насока: од анонимни, но сигурни извори стигнуваат информации дека Ливерпул веќе одлучил да го продаде Салах во јануари.
Клубот ќе чека соодветна понуда, а паралелно веќе работи на замена — сериозно се разгледува активирање на откупната клаузула на Антоан Семењо. Дополнително масло на оган: агентите на Салах откриле дека клубот тајно го нудел во Саудиска Арабија, што силно го разгневило Египќанецот.
Салах е подготвен да ги слушне сите опции — Барселона, Реал Мадрид, Баерн Минхен — но финансиските пакети од Саудиска Арабија може да направат разлика.
Сега останува да се види како ќе реагира „Енфилд“ на следниот домашен меч, кога Салах најверојатно повторно ќе гледа од клупата. По тоа, заминува на Африканскиот куп на нации — а прашањето „дали беше ова неговиот последен период во Ливерпул?“ станува сè погласно.
