Шефот на стручниот штаб на Кит Го, Добринко Илиевски – Пижон потенцира дека има огромна желба кај секој поединец од клубот да се стигне до трите бода во дерби пресметката против Борец од Велес во 24. коло од Втората лига – Исток.
Без разлика на претходниот пораз на гостувањето против Тиквеш, сега во составот тлее максимална мотивација за вистинско надигрување со лидерот во првенството и желба за триумф.
„Фактот дека Борец е лидер во шампионатот доволно зборува околу тоа за каков противник се работи. Секако тоа е дополнителен мотив и за нас отворено да го презентираме сиот наш квалитет, а носени од желбата да дојдеме до бодивите пред своите навивачи“ – вели Илиевски.
Илиевски не ги штеди и пофалбите за составот од Велес…
„Борец располага навистина со многу квалитетни млади фудбалери кои се одлично водени од Горазд Михаилов. Играат офанзивен фудбал, а ако се знае дека и Кит Го негува таков фудбал сето тоа дефинитивно ветува вистинско фудбалско уживање, квалитетен и интересен натпревар во Пехчево, во кој, повторно ќе кажам, се надевам дека ние на крајот ќе се радуваме“ – дополнува стратегот на Кит Го.
Натпреварот меѓу Кит Го и Борец се игра утре (4. мај) на Градскиот стадион во Пехчево со почеток од 16 часот.
