Дени Мусовски, напаѓачот со македонско потекло роден во Соединетите Американски Држави и едно од позвучните имиња во МЛС-лигата, и натаму ја негува желбата да настапува за репрезентацијата на Македонија. Ова го потврди претседателот на Фудбалската федерација на Македонија, Масар Омерагиќ.
Интересот на Мусовски за настап во дресот на „црвено-жолтите“ датира уште од 2020 година, кога јавно изрази подготвеност да се приклучи на националниот тим, но до денес не доби повик за сениорската селекција. Омерагиќ откри дека имал директна комуникација со напаѓачот и дека желбата за репрезентативен настап сè уште постои.
Првиот човек на ФФМ најави дека Федерацијата работи и на други потенцијални засилувања. Како една од поблиските опции го посочи Андреј Тодороски од ТСЦ Бачка Топола, кој е на чекор до репрезентативно деби, додека паралелно се следат и други фудбалери со право на настап за Македонија. Сепак, како што истакна, повик ќе добијат само оние што искрено сакаат да играат и се подготвени целосно да се посветат на националниот дрес.
Мусовски моментално е член на Сиетл во МЛС-лигата, каде сезонава забележа одличен учинок со 14 постигнати голови и пет асистенции на 31 настап. Во својата кариера има искуство и со настапи за Лос Анџелес, како и за неколку други клубови во американскиот фудбал.
