На гала-манифестација во Дубаи вечерва беа доделени престижните награди „Глоуб Сокер Авордс“. За најдобар фудбалер за 2025 година беше прогласен асот на Пари Сен Жермен, Осман Дембеле.
Францускиот репрезентативец ја заокружи извонредната година со уште едно големо признание, откако претходно славеше и во изборот за „Златната топка“ на „Франс Фудбал“, како и за наградата „The Best“ на ФИФА.
Признанието за најдобар фудбалер на Блискиот Исток му припадна на Кристијано Роналдо, додека награди во различни категории освоија и младите ѕвезди Ламин Јамал и Дезире Дуе, потоа Витиња, како и тренерот Луис Енрике.
Наградата за камбек на годината ја доби Пол Погба, кој успешно се врати на фудбалските терени по завршувањето на суспензијата поврзана со случајот со допинг.
Во категоријата најдобар клуб, во машка конкуренција признанието му припадна на Пари Сен Жермен, додека кај дамите за најдобар тим беше прогласена Барселона. За најдобар спортски директор беше избран Луис Кампос од ПСЖ, а титулата најдобар фудбалски агент заврши кај Жорге Мендеш.
