Селекторот на Шпанија, Луис де ла Фуенте, не ги криеше емоциите по драматичната победа на пенали против Холандија во четвртфиналето на Лигата на нации. Двете селекции приредија вистинско фудбалско шоу, постигнувајќи по три гола, пред победникот да биде одлучен со удари од белата точка.
Де ла Фуенте истакна дека ваков натпревар лесно можел да биде и финале на Европско првенство.
„Многу сме возбудени. Ова беше натпревар што можеше да биде финале на Европско првенство. Игравме на ниво кое ме изненади. Чувството е слично како кога ја освоивме титулата на ЕВРО 2024“, изјави Де ла Фуенте.
„Се соочија два тима со слични карактеристики, бидејќи сакаат да напаѓаат. Верувам дека навивачите уживаа во мечот. Сега сме во завршната фаза заедно со три поранешни светски шампиони и еден освојувач на ЕВРО 2016. Само погледнете кои тимови останаа – поранешен светски шампион како Италија веќе испадна. Не случајно го споредив овој турнир со Европско првенство“, додаде селекторот на „црвената фурија“.
