Албасете приреди вистинска сензација и со 3-2 го победи Реал Мадрид, ставајќи крај на настапот на „кралскиот клуб“ во Купот на Кралот.
Тимот кој игра во Сегунда, вториот ранг на шпанскиот фудбал, ја продлабочи кризата на Реал и му приреди шокантно деби на новиот тренер Алваро Арбелоа. За Албасете, ова е прва победа во историјата над големиот шпански гигант.
Мечот беше вистинска драма: Албасете поведе во 42. минута преку Виљар, а Мастантуоно израмни во последните моменти од првиот дел. Во 82. минута Бетанкор повторно ги доведе домаќините во водство.
Реал се чинеше дека се спаси со голот на Гонзало Гарсија за 2-2, но победничкиот гол за Албасете дојде во 94. минута – Хефте Бетанкор постигна својот втор гол на мечот и го обезбеди сензационалниот триумф.
