Дарко Чурлинов има одличен старт во дресот на Погон Шчечин. Македонскиот репрезентативец се запиша меѓу стрелците на мечот против Мотор Лублин и на најдобар начин ја оправдува довербата што полскиот клуб му ја укажа во летниот преоден рок.
Чурлинов постигна гол на својот втор настап за Погон, и тоа во 17. минута од натпреварот против Лублин. По една интервенција на противничкиот голман, топката се одби до македонскиот офанзивец, кој без многу размислување ја испрати во мрежата за водство на својот тим од 1-0.
За Чурлинов ова е одличен почеток во новата средина. По враќањето во натпреварувачки ритам, македонскиот фудбалер покажува дека може да биде едно од важните оружја во нападот на Погон Шчечин.
Неговите настапи се одлична вест и за македонската репрезентација, особено во пресрет на новите репрезентативни предизвици. Доколку продолжи во ист ритам, Чурлинов би можел да има значајна улога и на клупски и на репрезентативен план.
