Ѕвездата на Челси, Кол Палмер, ќе биде надвор од терените околу три недели. Тоа значи дека тој ќе ги пропушти натпреварите против Брајтон и Ливерпул во Премиер-лигата, како и дуелот со Бенфика во Лигата на шампионите, до паузата за репрезентации на почетокот на октомври.
„Одлучивме да го заштитиме Кол и да не ја влошиме повредата. Ќе има одмор од 2-3 недели до паузата за репрезентации, за да се врати целосно и подготвен по паузата. Не мислам дека ќе му биде потребна операција“, изјави менаџерот на Челси, Енцо Мареска.
Италијанскиот стратег додаде дека и Тосин Адарабиојо и Весли Фофана се повредени и ќе го пропуштат утрешниот дуел со Брајтон, додека голманот Роберт Санчез е суспендиран.
„Роберт имаше одличен период. На крајот на минатата сезона и на почетокот на оваа беше фантастичен. Направи грешка против Манчестер Јунајтед и знае за тоа. Како менаџер, многу пати сум кажувал дека кога еден голман или еден играч од средината на теренот згреши, нема разлика“, додаде Мареска.
„Се обидуваме да правиме ротации поради бројот на натпревари, но понекогаш тоа е невозможно поради недостиг на играчи. Во моментов имаме седум или осум повредени фудбалери. Дали ова е последица од минатата сезона? Не знам“, заклучи тој.
