Челси официјално го објави трансферот на централниот дефанзивец Максенс Лакроа. Францускиот репрезентативец пристигнува од Кристал Палас, а вкупната вредност на трансферот изнесува 51 милион фунти.
Лакроа потпиша шестгодишен договор со „сините“ и стана ново засилување во одбраната на тимот од „Стемфорд Бриџ“.
„Мислам дека ова е најдобриот чекор за мене, бидејќи ова е најдобриот тим во светот. Разговарав со Мало (Густо), Трев (Чалоба) и Беноа (Бадијашил). Лесно е за луѓето да кажуваат убави работи за овој клуб, бидејќи има богата историја, а јас сум навистина горд што сум дел од него“, изјави Лакроа по потписот на договорот.
Французинот е првиот фудбалер на возраст од 26 години или повеќе што Челси го ангажирал од летото 2022 година. По неговото пристигнување, лондонскиот клуб веќе потроши повеќе од 250 милиони фунти за летната селекција.
Се очекува Челси во следниот период да работи и на продажба на неколку играчи, меѓу кои се споменуваат дефанзивците Трево Чалоба, Беноа Бадијашил и Аксел Дисаси.
