Напаѓачот на Тотенхем, Бренан Џонсон, беше пресреќен по историскиот триумф на својот тим во финалето на Лига Европа против Манчестер Јунајтед (1-0), со што „спарси“ го прекинаа долгото 17-годишно чекање на голем трофеј.
Велшанец не можеше да ги смири емоциите.
„Толку сум среќен во моментов. Сезоната не беше добра, но сега тоа никому не му е важно. Ова значи премногу. Навивачите страдаа, ние страдавме што не освоивме ништо, но сега, конечно, го добивме трофејот – и тоа прв по долго време. Пресреќен сум.“
Тој го постигна единствениот гол на мечот.
„Од моментот кога дојдов во Тотенхем, сите повторуваа: ‘Добар тим, но никогаш не го прават потребниот чекор’. Епа, сега го направивме. Знаев дека ја допрев топката, погледнав нагоре и ја видов како полека влегува во мрежата. Не можам да го опишам чувството. Не е важно што јас сум стрелецот, важно е дека победивме.“
Последните минути беа вистинска драма за Бренан Џонсон.
„Последните неколку минути беа ужас. Не можев ни да гледам, само слушав што зборуваат другите и прашував колку време остана. Кога го одбранивме тој корнер на крајот – знаев. Тоа олеснување… не се опишува.“
Тој и покрај слабата сезона во Премиер-лигата (17. место), ја пофали поддршката од навивачите.
„Знам дека 17. место воопшто не е добро, но имавме неверојатен европски поход. Навивачите беа фантастични, искрено мислам дека беа подобри од тие на Јунајтед. Тоа нè туркаше напред.“
На крајот, му се заблагодари и на менаџерот Анге Постекоглу.
„Не можам доволно да му се заблагодарам. Имаше неверојатна верба во нас, особено во Европа. Секогаш знаеше како да нè мотивира. Ова е негов момент“, истакна херојот на Тотенхем.
