Пелистер официјално го назначи Борче Христов за нов шеф на стручниот штаб, откако со искусниот стратег потпиша двегодишен договор.
Од битолскиот клуб истакнаа дека договорот е склучен со јасно дефинирани цели и амбиции, а главната задача ќе биде експресно враќање на Пелистер во Првата македонска фудбалска лига.
Христов зад себе има богато искуство во македонскиот фудбал, како и значајна меѓународна кариера. Последен ангажман имаше во Тиквеш, а претходно ги предводеше Борец, Работнички, Еуромилк Горно Лисиче, Македонија Ѓорче Петров и Шкендија. Во странство беше дел од стручните штабови на Карабах и Зира.
Од Пелистер веруваат дека неговото знаење, карактер и визија ќе бидат важен фактор во исполнувањето на амбициозните цели на клубот.
Подготовките за новата сезона ќе започнат на 9 јули, кога е закажана првата прозивка и официјалниот старт на подготовките за претстојните предизвици.
