Кристијано Роналдо би можел од најголемата ѕвезда на Ал-Наср наскоро да добие сосема нова улога, откако во последните часови се појавија информации за можни големи промени во сопственичката структура на саудискиот гигант.
Според информациите кои кружат во Саудиска Арабија, Ал-Наср би можел да стане предмет на сериозни разговори за нов сопственик, а во центарот на вниманието се најде Џери Кардинале, човекот кој стои на чело на РедБирд и истовремено е сопственик на Милан.
Според ексклузивните информации на „СпортИталија“, Кардинале веќе преку посредници остварил прелиминарни и индиректни контакти со цел да ја испита можноста РедБирд да влезе во сопственичката структура на Ал-Наср.
Приказната веднаш доби дополнителна тежина поради Кристијано Роналдо. Португалската суперѕвезда и понатаму е фудбалер на Ал-Наср, а евентуалното влегување на голем инвестициски фонд во клубот би можело целосно да ја промени неговата иднина, но и начинот на кој би функционирал клубот.
Некои извештаи кои се појавија на социјалните мрежи отидоа чекор понатаму, наведувајќи дека Роналдо би можел да биде дел од инвестицискиот тим, заедно со уште неколку големи бизнисмени.
Значајна улога во целата приказна има и Саудискиот јавен инвестициски фонд (ПИФ). Според информации од извори запознаени со ситуацијата, ПИФ веќе извесен период ја разгледува можноста да се повлече од сопствеништвото на најмалку два големи саудиски клуба, меѓу кои се споменува и Ал-Наср.
Тоа би можело да отвори простор за влез на нови инвеститори, па во наредните месеци се очекуваат многу повеќе разговори за иднината на клубот од Ријад.
За Кардинале, потенцијалниот влез во Ал-Наср би претставувал интересно проширување на неговиот бизнис-модел.
Американецот веќе развива мултиклупска стратегија околу Милан и Тулуз, а саудискиот пазар би бил целосно ново и стратешки исклучително значајно подрачје за таков проект.
Доколку дојде до реализација на идејата за купување на Ал Наср, а во проектот биде вклучен и Роналдо, тоа би претставувало огромна промена за саудискиот клуб и би можело да донесе нова ера во Ријад.
