Бојан Миовски промовиран во Глазгов Ренџерс, го одржа и првиот тренинг (ФОТО)

Македонскиот напаѓач Бојан Миовски е ново засилување на шкотскиот гигант Глазгов Ренџерс. По вчерашниот потпис, клубот и официјално го претстави репрезентативецот во своите редови.

Миовски се обврза на четиригодишна верност кон „Ренџерс“, договорот важи до јуни 2029 година. По еден краток престој во шпанска Џирона, тој повторно се враќа на Островот, каде што претходно остави силен белег со дресот на Абердин, постигнувајќи 44 погодоци во периодот од 2022 до 2024 година.

„Пресреќен сум што станав дел од овој клуб со толку богата историја. Кога слушнав за интересот на Глазгов Ренџерс, знаев дека ова е вистинското место за мене. Едвај чекам да ги запознам новите соиграчи и да ги почувствувам првите минути на теренот во овој дрес“, изјави Миовски на своето промотивно претставување.

И тренерот на тимот, Расел Мартин, не ја криеше радоста по доаѓањето на Македонецот.

„Со Миовски добиваме напаѓач кој има исклучително движење, интелигенција и голгетерски инстинкт. Тој веќе се докажа во шкотската лига и верувам дека ќе биде голем плус за нашите офанзивни решенија“, изјави менаџерот на шкотскиот гигант.