Шпанскиот прволигаш Бетис подготвува нова понуда до Манчестер Јунајтед со цел да го задржи Ентони во своите редови, пренесуваат медиумите на Пиринеите. Тимот од Севилја планира да побара нова позајмица за Бразилецот, но овојпат со задолжителна клаузула за откуп на крајот на следното лето.
Најголем проблем за реализација на зделката би можела да биде високата плата на Ентони. Во моментов тој заработува околу 8 милиони фунти годишно во Манчестер Јунајтед, а англискиот клуб досега покриваше дел од неговите примања за време на престојот во Бетис.
Според повеќе извори, Ентони изразил подготвеност да ја намали својата плата за да остане во Бетис – клуб во кој, како што самиот вели, се чувствува одлично. Сега останува да се водат преговори помеѓу шпанскиот клуб, фудбалерот и неговите агенти за да се постигне договор околу личните услови.
Иако Манчестер Јунајтед претходно инсистираше на постојан трансфер, недостигот од конкретни понуди може да ги натера „црвените ѓаволи“ да прифатат нова позајмица со обврска за откуп.
