Реал Мадрид неочекувано киксна на домашен терен, губејќи од Валенсија со 1-2 во натпревар од 30. коло во Ла Лига, резултат што дополнително ги оддалечи „кралевите“ од првото место на табелата, кое го држи Барселона.
Иако мечот понуди неколку клучни моменти – како промашениот пенал на Винисиус во 13. минута и голот на Хуго Дуро во 95. минута за победа на гостите, најмногу внимание привлече потегот на Џуд Белингам по завршувањето на средбата.
Англискиот ас, видно разочаран и фрустриран, во минување покрај ВАР-опремата ја удри со нога. Сцената беше снимена и веднаш се прошири на социјалните мрежи, отворајќи прашања за можни последици по играчот.
Според дисциплинските прописи на Ла Лига, вакви постапки – агресија кон техничка опрема – се сметаат за несоодветно однесување. Ако Дисциплинската комисија оцени дека Белингам ја оштетил опремата намерно, може да следи казна во вид на суспензија од еден до три натпревари.
За Реал, кој се бори за секој бод, евентуално отсуство на Белингам би било сериозен удар.
