Тренерот на Шкендија, Јетон Беќири, изрази задоволство по убедливата победа од 1-4 на гостувањето кај Тиквеш во 18. коло од ПМФЛ.
Тиквеш поведе со голот на Стојкоски во 24. минута, но Тамба израмни на крајот на првото полувреме. Во вториот дел, головите на Мелиќи (48.), Зејнулаи (66.) и Нзенге (78.) ја потврдија победата на Шкендија со 1-4.
Беќири ја истакна важноста на карактерот на тимот.
„Овие победи значат повеќе од три бода, затоа што покажуваат сила и карактер на екипата. Дури и кога примивме гол, им реков на играчите да веруваат – во второто полувреме имавме повеќе простор и шанси за постигнување голови. Задоволен сум од перформансот и резултатот, освен за две ситуации во првите минути кога противникот ни направи проблеми. Карактерот на тимот се виде јасно по реакцијата на играчите.“
Тој исто така нагласи значењето на поливалентноста на играчите.
„Дури и со отсуство на Имран Фетаи и Себастијан Спахиу, тимот настапи многу добро. Победите со пресврт ја зголемуваат самодовербата и покажуваат дека нема простор за сомневање во квалитетот на Шкендија по 7-8 месеци успешни настапи.“
За состојбата на теренот и квалитетот на противникот, Беќири додаде:
„Натпреварот се играше на многу тежок терен, што не би требало да се случува во Првата македонска лига. Сепак, создадовме многу шанси и постигнавме четири гола. Тиквеш не е слаб тим; тие играат цврсто и се квалитетни. По четирите водечки екипи, Тиквеш е најтежок противник за победа, било дома, било како гостин.“
