Барселона има намера да го задржи Маркус Рашфорд во својот состав и за сезоната 2026/27. Според шпанскиот весник „АС“, англискиот репрезентативец, кој оваа сезона има седум голови и 11 асистенции во 26 натпревари, ги убедил раководните луѓе на Каталонците и ја има поддршката од Ханси Флик да продолжи да го носи дресот на Барса.
Сега дилемата пред Барселона е поврзана со формулата на зделката: или да ја активираат опцијата за откуп, поставена на 30 милиони евра, или да се обидат да го убедат Манчестер Јунајтед да ја продолжи позајмицата за уште една сезона.
Останувањето на Рашфорд може да влијае врз иднината на Ансу Фати, кој губи место во Монако и сè потешко го гледа своето враќање на „Камп Ноу“. Што се однесува до самиот Рашфорд, напаѓачот е задоволен во Барселона, покажува добар однос дури и кога не е во стартниот состав и позитивно гледа на можноста да ја продолжи врската со каталонскиот клуб – било трајно или преку нова позајмица.
