Томас Милер (35), симболот на Баерн Минхен и еден од најуспешните фудбалери во историјата на германскиот фудбал, ќе стави крај на својата долга и блескава епизода во клубот на крајот од оваа сезона. Верен на Баерн уште од своето детство, Милер е дел од клубот од 10-годишна возраст, а за првиот тим има импресивни 750 настапи, при што постигна 248 голови и забележа 274 асистенции.
Во текот на кариерата со Баерн, Милер освои 12 титули во Бундеслигата, шест национални купови и два трофеи во Лигата на шампионите, оставајќи неизбришлив белег во историјата на клубот.
Пред натпреварот со Борусија Менхенгладбах, клубот му оддаде почит со пригодни подароци, а навивачите му приредија спектакуларна кореографија како знак на благодарност. Заедно со него, се прости и Ерик Даер, кој исто така си заминува од Минхен.
Баерн објави видео со незаборавни моменти од кариерата на Милер со силната порака: „Томасе, ти се поклонуваме“.
Во отворено писмо до навивачите, Милер напиша:
„По 25 години како дел од овој клуб, моето фудбалско патување со Баерн завршува ова лето. Тоа беше навистина неверојатно искуство, полно со незаборавни триумфи и моменти што засекогаш ќе ги носам во срцето. Вечно сум благодарен.“
Баерн го одбележа јубилејниот 750-ти натпревар на Милер со победа од 2-0 против Менхенгладбах. Головите ги постигнаа Хари Кејн во 31-та и Мајкл Олисе во 90-тата минута.
