Баерн ќе го повлече дресот со број „5“ во чест на Франц Бекенбауер

Баварскиот гигант Баерн Минхен донесе одлука да го повлече дресот со број „5“ од употреба во чест на легендарниот Франц Бекенбауер, кој почина на 7 јануари на 78-годишна возраст.

Одлуката беше соопштена од претседателот на клубот, Херберт Хајнер, на годишното собрание на клубот, кое беше одржано во присуство на вдовицата Хајди Бекенбауер и синот на легендарниот фудбалер, Јоел.

Соопштението беше дочекано со бурни аплаузи од присутните.

„Бројот „5“ ќе остане зачуван како симбол на уникатното наследство на Франц. Нашиот клуб и неговата историја се незамисливи без него“, изјави Хајнер.

„Оваа година Баерн Минхен ја загуби најголемата личност во својата историја. Драг Франц, ти го направи нашиот клуб тоа што е денес: синоним за најголем можен успех, уникатен стил и длабока човечност. Како играч, тренер, претседател и пријател, му го даде на Баерн сјајот што и денес продолжува силно да свети“, истакна претседателот на Баерн Минхен.

Франц Бекенбауер е еден од најголемите фудбалски ликови во историјата. Покрај неговите успеси на теренот, тој го обликуваше Баерн Минхен како глобален бренд, оставајќи трајно наследство во фудбалот.