Дефанзивецот Дајот Упамекано е многу блиску до продолжување на договорот со Баерн Минхен по завршувањето на сезоната, објавува германскиот весник „Билд“. Според информациите, клубот и фудбалерот веќе се усогласиле околу клучните точки од новиот договор, а преостануваат да се договорат само завршните детали, меѓу кои и откупната клаузула.
Со новиот договор, 27-годишниот француски репрезентативец ќе добие значително подобри финансиски услови. Упамекано пристигна во Баерн во 2021 година од Лајпциг, во трансфер вреден 42,5 милиони евра.
„Нема притисок од моја страна, се надевам дека наскоро ќе има конечна одлука. Не постојат рокови. Среќен сум што настапувам за толку голем клуб“, изјави Упамекано.
Тренерот на актуелниот германски шампион, Венсан Компани, исто така посакува Упамекано да остане дел од тимот, кој во моментов се наоѓа на врвот на табелата во Бундес-лигата.
