Атлетико Мадрид не успеа да стигне до цел плен на гостувањето кај Галатасарај во Истанбул и мораше да се задоволи со реми од 1-1 во седмото коло од Лигата на шампионите. Иако „јорганџиите“ имаа поголема иницијатива и повеќе зрели шанси, домаќинот успеа да извлече важен бод пред својата публика.
Избраниците на Диего Симеоне одлично го отворија натпреварот и уште во четвртата минута дојдоа до водство, кога Џулијано Симеоне прецизно ја затресе мрежата на турскиот гигант. Сепак, Галатасарај брзо се консолидираше и успеа да се врати во игра во 20. минута, кога Маркос Љоренте несреќно постигна автогол, поставувајќи го конечниот резултат на првото полувреме, 1-1.
Во продолжението, Атлетико целосно ја презеде контролата врз играта и создаде неколку сериозни можности за втор погодок, но недостасуваше завршница за да се скрши отпорот на Галатасарај, кој умешно се бранеше и го сочува бодот.
Возбудувања не недостасуваа ниту на дуелот меѓу Карабах и Ајнтрахт Франкфурт, каде што домаќините славеа со драматична победа од 3-2. Херој на азербејџанскиот тим беше Балул Мустафазада, кој во 94. минута го постигна победничкиот погодок и донесе огромна радост на трибините.
Претходно, двата гола за Карабах беа дело на колумбискиот напаѓач Камило Дуран, кој имаше одлична вечер, додека за Ајнтрахт Франкфурт стрелци беа Чан Узун и Фарес Чаиби. Кога се чинеше дека натпреварот ќе заврши без победник, Мустафазада се појави во вистински момент и го запечати третиот сезонски триумф на Карабах во Лигата на шампионите.
