Астон Вила се појави како сериозен конкурент на Рома во битката за потписот на Ендрик. Според информациите на шпанскиот весник „АС“, англискиот клуб покажал голем интерес за бразилскиот напаѓач и сака да го доведе на позајмица од Реал Мадрид.
20-годишниот фудбалер е отворен за нова позајмица, особено по одличниот период вo Лион. Токму настапите во Франција му помогнаа повторно да се наметне и да обезбеди место во репрезентацијата на Бразил за Светското првенство.
Ендрик во дресот на Лион остави одличен впечаток. На 21 натпревар постигна осум голови и седум асистенции, покажувајќи дека му е потребна редовна минутажа за да го покаже својот целосен потенцијал.
Реал Мадрид пред две години плати 35 милиони евра за неговиот потпис, а со бонусите сумата може да достигне дополнителни 25 милиони евра. Сепак, ситуацијата во Мадрид не му оди во прилог.
По пристигнувањето на Јан Диоманде, конкуренцијата во нападот станува уште поголема, па шансите Ендрик редовно да добива минути на „Сантијаго Бернабеу“ се намалуваат.
Самото фудбалерот сака следната сезона да игра во клуб кој настапува во Лигата на шампионите, а Астон Вила целосно го исполнува тој услов.
Реал Мадрид, пак, нема ништо против нова позајмица и е подготвен да помогне околу финансискиот дел од операцијата. Според информациите, „кралскиот клуб“ би покрил дел од годишната плата на Ендрик, која изнесува околу 5 милиони евра.
Така, покрај Рома, сега и Астон Вила сериозно се вклучува во трката за младиот Бразилец. Останува да се види каде Ендрик ќе го продолжи развојот, но јасно е дека неговиот приоритет е еден – редовна игра на највисоко ниво.
