Арсими денеска ќе гостува во Кратово со јасна цел, да обезбеди победа против Силекс и да го избегне баражот, со што би го потврдил опстанокот во Првата лига на Македонија. Оваа пресметка се смета за една од најважните за клубот оваа сезона, бидејќи директно ќе одлучува за судбината на тимот.
Во пресрет на натпреварот, фудбалерот на Арсими, Ремзифаик Селмани, изрази оптимизам и верба во екипата, нагласувајќи дека подготовките поминале во најдобар ред и дека атмосферата во тимот е на високо ниво.
„Во текот на целата недела работевме максимално посветено и атмосферата во тимот е многу позитивна. Сите сме мотивирани и свесни за значењето на овој натпревар. Силекс е квалитетен противник, особено на домашен терен, но ние добро се подготвивме и ќе излеземе на терен со самодоверба.”
„Многу сме блиску до остварување на нашата цел и не сакаме да дозволиме таа да ни избега. Во Кратово одиме по позитивен резултат, односно по победа, бидејќи сакаме да го обезбедиме опстанокот без бараж. Свесни сме дека нема да биде лесно, но веруваме во нашите квалитети и во тимската игра што ја градевме во текот на целата сезона. ”
”Ќе дадеме максимум во секој момент, ќе се бориме за секоја топка и ќе покажеме карактер на теренот. Вакви натпревари се добиваат со срце, дисциплина и голема желба. Сигурен сум дека ако го дадеме најдоброто од себе, ќе се вратиме со резултат кој ни е потребен”, изјави Селмани.
Натпреварот од 32. коло меѓу Силекс и Арсими ќе се одигра денес во стадионот во Кратово со почеток од 16 часот.
