Арсими вечерва официјално го претстави своето ново засилување, откако постигна договор со младиот играч за врска Матео Софијаноски.
Станува збор за еден од најбараните македонски фудбалери во актуелниот преоден рок, кој во Арсими пристигнува од редовите на Македонија Ѓорче Петров. Минатата сезона одигра 31 натпревар, постигна два гола и забележа четири асистенции.
Пред настапите за Македонија ЃП, Софијаноски беше дел од Брегалница, Воска Спорт и Тетекс, додека своите први фудбалски чекори ги направи во младинските школи на Вардар и Њу Старс.
Младиот фудбалер е стандарден член и на младата репрезентација на Македонија до 21 година, а во Арсими ќе се очекува да биде едно од клучните засилувања за новата сезона.
