Арсенал повторно се врати на победите и ја запиша својата десетта победа оваа сезона, совладувајќи го Брентфорд со 2-0 на „Емирати“. Иако Микел Артета се соочи со кадровски проблеми и беше принуден да ротира поради повреди, лидерот на Премиер лигата без поголеми потешкотии ја доби лондонската пресметка.
Микел Мерино повторно беше искористен во нападот и уште еднаш ја оправда довербата. Во 11-тата минута, по идеална асистенција на Бен Вајт, Шпанецот стрелаше прецизно за водство на „топчиите“.
Победата на Арсенал беше запечатена во 91-та минута, кога Букајо Сака со смирен и прецизен удар го постави конечниот резултат – 2-0. Составот на Артета продолжува да ја предводи табелата со пет бода предност во однос на Манчестер Сити.
Највозбудливиот дуел од денот го приредија Брајтон и Астон Вила, каде што гостите победија со 3-4. Оли Воткинс постигна два гола за Вила, а во листата на стрелците се запишаа и Онана и Мален.
Минимални победи остварија Кристал Палас и Нотингам Форест – Палас со 0-1 на гостувањето кај Барнли, а Форест со истиот резултат против Вулверхемптон.
