Англискиот првак Ливерпул оствари тешка, но исклучително вредна победа од 2-1 на домашен терен против Вулверхемптон во натпревар од 18. коло на Премиер – лигата. На „Енфилд“, еден од клучните моменти на средбата беше првиот гол на Флоријан Вирц во дресот на Ливерпул – погодок што внесе дополнителна самодоверба и кај самиот фудбалер и кај целиот тим.
По последниот судиски свиреж, менаџерот на „црвените“ Арне Слот зборуваше за значењето на голот за германскиот плејмејкер и за неговиот севкупен настап.
„Мислам дека сум целосно сигурен дека тоа беше олеснување за него. Ја видов неговата реакција кога постигна гол, а истото важеше и за неговите соиграчи – тие навистина се радуваа за него“, изјави Слот.
Холандскиот стручњак нагласи дека во фудбалот многу често индивидуалната оценка се сведува исклучиво на статистиката.
„Во овој спорт, можеби со право, сите ние се оценуваме главно според резултатите, а поединечните играчи – според голови и асистенции. Но понекогаш забораваме што сè друго можат да ѝ дадат на екипата за време на натпреварот“, додаде тој и беше дециден дека Вирц има значаен придонес и надвор од конкретниот погодок.
„Мислам дека одигра многу добри натпревари за нас и гледам како се подобрува од меч во меч. Стануваше сè посилен физички и сè поблиску до својот прв гол, па не е изненадување што денес успеа да се запише во листата на стрелците.“
Сепак, тренерот на Ливерпул јасно стави до знаење дека очекувањата кон Германецот се далеку поголеми.
„Тој ќе биде првиот што ќе сфати дека еден гол не е доволен. Се надевам и верувам дека ќе постигне многу повеќе голови за нас од овој еден. Но, освен тоа, во големи делови од натпреварот неговата игра навистина ми се допадна. Имаше моменти во кои беше посебен.“
