Поранешниот менаџер на Ливерпул, Арне Слот, сака да остане во европскиот фудбал и покрај сериозниот интерес од саудискиот Ал-Ахли, пренесува „ЕСПН“.
Според информациите, 47-годишниот холандски стратег бил прв избор на клубот од Џеда за наследник на Матијас Јајсле, но засега не размислува за преселба во Саудиска Арабија.
Наместо тоа, Слот има намера кариерата да ја продолжи во некое од најсилните европски првенства. По разделбата со Ливерпул, интерес за неговите услуги покажале клубови од Англија, Германија и Италија.
Холандскиот стручњак зад себе има успешен престој на „Енфилд“, каде што го предводеше Ливерпул до 20-тата шампионска титула во Премиер лигата во сезоната 2024/25.
Во изминатиот период неговото име се поврзуваше и со селекторската функција во Фудбалска федерација на Холандија, по оставката на Роналд Куман, кој си замина по раната елиминација на Холандија од Светското првенство 2026.
Сепак, според последните информации, приоритет на Арне Слот останува враќање на клупската сцена во некоја од најсилните европски лиги.
