Со приближувањето на финалето на Светското првенство 2026 меѓу Шпанија и Аргентина, светски познатата музичка ѕвезда повторно јавно ја покажа својата поддршка за тимот на Лионел Скалони. Станува збор за Дрејк, кој направи огромен облог од 1.500.000 долари на победа на „албиселесте“ и го сподели тикетот на своите социјални мрежи.
Канадскиот рапер и продуцент, кој често се обложува на големи спортски настани, објави фотографија од уплатениот износ. Објавата ја придружи со порака:
„Како беше онаа поговорка? Повеќе среќа следниот пат… нема потреба да кажам повеќе“, со што јасно покажа дека верува во триумф на Аргентина.
Ова не е првпат Дрејк да го поддржува јужноамериканскиот тим. Пред финалето на Светското првенство во Катар во 2022 година, тој исто така вложи 1.000.000 долари на Аргентина. Тогаш тимот предводен од Лионел Скалони ја победи Франција по изведување пенали и ја освои третата светска титула. Сепак, облогот на Дрејк беше неуспешен, бидејќи тој предвидуваше победа на Аргентина уште во регуларниот дел.
Канадскиот музичар има интересна репутација во спортскиот свет. На социјалните мрежи со години кружи таканареченото „проклетство на Дрејк“ – теорија според која многу тимови и спортисти што добиле поддршка од раперот подоцна доживуваат порази.
Сепак, Аргентина не беше погодена од ова „проклетство“ во претходното финале, иако самиот Дрејк финансиски загуби поради погрешната прогноза.
За „проклетството на Дрејк“ почна да се зборува откако навивачите забележаа дека многу познати спортисти кои се фотографирале со него набрзо потоа доживеале неуспеси. Меѓу нив се фудбалерите Серхио Агуеро, Пол Погба, Пјер-Емерик Обамејанг, Џејдон Санчо и Левин Курзава.
Меѓу останатите спортисти кои наводно ја почувствувале лошата среќа по средба со Дрејк се и Конор Мекгрегор, Серена Вилијамс и Ентони Џошуа. Раперот во последниот период имаше и неколку погрешни прогнози во боречките спортови, меѓу кои и мечевите на Тајсон Фјури против Александар Усик, Мајк Тајсон против Џејк Пол, како и Пол против Џошуа.
Сега, со уште поголем влог, Дрејк повторно застана зад актуелниот светски шампион. Конечниот одговор ќе биде познат во недела, кога Аргентина и Шпанија ќе се сретнат во големата битка за титулата на Мундијалот 2026 и за можноста да додадат нова ѕвезда на своите дресови.
