Финалето на Светското првенство меѓу Аргентина и Шпанија ќе добие дополнителни 30 минути, откако по 90 минути игра резултатот остана непроменет – 0-0.
Голем удар за актуелниот светски шампион пристигна длабоко во судиското продолжение, кога Енцо Фернандез беше исклучен. Аргентинскиот репрезентативец грубо стартуваше врз Пау Кубарси, заработи втор жолт картон и предвреме го заврши настапот, оставајќи ја својата селекција со десетмина фудбалери.
Шпанија беше поопасниот противник во текот на регуларниот дел. „Црвената фурија“ имаше поголем посед на топката, го контролираше темпото и создаде неколку добри можности пред голот на Емилијано Мартинез, но без посакуваната реализација. Најблиску до погодок беше Нико Вилијамс, кој во судиското продолжение не успеа да ја искористи одличната шанса.
Аргентина најголем дел од натпреварот се потпираше на цврста одбрана и брзи контранапади, но во продолженијата ќе ја очекува уште потешка задача. Со играч помалку на теренот, избраниците на Лионел Скалони ќе мора да издржат силен притисок од Шпанците, кои ќе се обидат да ја искористат бројчаната предност и да стигнат до светската титула.
