Лидерот во Серија А, Наполи, има големи амбиции за следната сезона, а една од нив е ангажман на Џек Грилиш од Манчестер Сити, објавуваат британските медиуми. Според информациите, тренер на Наполи, Антонио Конте, е голем обожувател на англискиот репрезентативец и токму тој го бара неговиот потпис.
Грилиш, кој пристигна во Сити од Астон Вила во 2021 година за 117,5 милиони фунти, оваа сезона ретко беше стартер и одигра само 19 натпревари во Премиер – лигата. Тоа го прави потенцијално отворен за трансфер, доколку стигне вистинска понуда.
Наполи е прв на табелата со три поени предност пред Интер, и Конте сака звучно засилување кое ќе му донесе квалитет и искуство за настапите во Лигата на шампионите.
Освен Грилиш, уште едно големо име на списокот на Наполи е и Кевин де Бруин, кој исто така би можел да го напушти Манчестер Сити по завршување на сезоната.
Наполи го доведе Скот Мектоминеј, поранешниот играч на Манчестер Јунајтед, и тоа се покажа како полн погодок за тимот оваа сезона во Серија А.
