Тренерот на Реал Мадрид, Карло Анчелоти, со задоволство го коментираше драматичното реми 4-4 против Реал Сосиедад во реваншот од полуфиналето на Купот на Кралот, со оглед дека по голема борба неговиот тим успеа да избори пласман во финалето.
Неговиот тим беше во негатива во поголемиот дел од мечот, но искусниот стратег во ниту еден момент не се посомневал во конечниот успех. Сепак, и покрај пласманот во финалето, Анчелоти призна дека примањето четири гола е причина за загриженост.
„Ова беше спектакуларен натпревар, исполнет со грешки, но и со многу позитивни моменти. Најважно е што ја остваривме целта и обезбедивме финале. Дури и кога губевме, останав смирен, бидејќи на ‘Бернабеу’ ништо не е невозможно. Реал Мадрид никогаш не се предава, особено пред своите навивачи“, изјави Анчелоти.
Тој истакна и некои критични моменти во играта на својот тим.
„Во одредени ситуации ни недостигаше среќа. Алаба двапати ја допре топката на начин што ни донесе проблеми, но такви работи се случуваат во фудбалот. Примивме четири гола, што не е добро, но затоа постигнавме исто толку. Балансот ни недостасуваше, но го надополнивме со исклучителна офанзивна игра. Да постигнеш четири гола против Реал Сосиедад не е мала работа“, заклучи италијанскиот стратег.
