Фудбалската репрезентација на САД доживеа шокантен пораз од Панама (0-1), и покрај тоа што важеше за еден од главните фаворити во КОНКАКАФ Лигата на нациите. Ова беше ноќ за заборав за Американците, кои испаднаа од натпреварувањето по примениот гол во самиот финиш.
Иако селекцијата на Маурисио Покетино имаше целосна контрола врз играта, судбината им приреди горчлив крај. Џош Сарџент ја затресе мрежата во 25. минута, но неговиот погодок беше поништен поради офсајд. Без реализација на толку шанси, Американците беа казнети – Сесилио Вотермен во 95. минута ја затресе нивната мрежа и ѝ донесе на Панама историска победа.
Прославата на Вотермен беше посебен момент. Тој веднаш ја сподели својата радост со легендарниот Тиери Анри, кој беше присутен како стручен коментатор. Интересно, Вотермен пред мечот истакна дека Анри му е идол, а по завршувањето на натпреварот му го подари својот дрес. Француската легенда му вети дека ќе му врати со дрес од неговиот период во Арсенал.
По овој неочекуван исход, САД ќе се обиде да го освои третото место во дуелот против Канада, додека Панама ќе се бори за титулата против Мексико, кој славеше со 2-0 против Канаѓаните.
