Тренерот на Милан, Масимилијано Алегри, не го криеше своето разочарување по ремито 1-1 со Џеноа. Според него, овој натпревар треба да биде лекција за зрелост за неговиот тим, кој мора да научи како да победува во вакви средби ако сака да се бори за повисоки цели.
„Во фудбалот го добиваш тоа што го носи резултатот. Мора да ги гледаме и позитивните работи, и покрај тешкото прво полувреме. Тие трчаа многу, го чуваа Модриќ човек-на-човек, а ние имавме две-три добри шанси да постигнеме гол. Потоа примивме погодок. Во второто полувреме приказната беше поинаква: ја зголемивме интензивноста, а тие се повлекоа подлабоко. Тоа се работите во кои мора да напредуваме. Во текот на една сезона има вакви натпревари, кога во 91. минута ти остануваат уште четири минути да се бориш за победа против тим кој тогаш е во голема психолошка криза. Треба да создадеш неколку опасни ситуации, да ја донесеш топката поблиску до казнениот простор, без да се изложиш на контранапад, каков што нè доведе во опасност да загубиме. Ова е лекција за зрелост што мора да ја научиме. Ако сакаме да завршиме во Tоп 4, бодовите се многу важни“, започна Алегри.
„Не можеш да очекуваш еден натпревар да ги реши сите проблеми, освен ако не е последниот. Мора да ја подобриме јасноста во мислењето кога се приближуваме до противничкиот гол. Во последните два натпревари бевме многу добри во одржувањето на балансот, но овојпат ни недостигаше трпение по 0-1. Станавме премногу избрзани, а избрзаноста не води никаде“, продолжи стратегот.
Тој се осврна и на применот гол и неговото влијание врз натпреварот.
„Коломбо добро реагираше во таа ситуација, но и Габија се лизна. Бевме премногу брзоплети – натпреварите траат 100 минути. Ако не постигнеш гол, не смееш да примиш, а кога нема да примиш, противникот постепено губи сила. Потребно е малку трпение. Ова е важен и тежок момент. Секој натпревар е важен и мора да им пристапуваме смирено. Разочарувачки е што не победивме дома. Тимот шутираше многу, создаде многу шанси, но на крајот сè беше залудно. Всушност, на крајот имавме и среќа бидејќи тие промашија пенал. Сега ќе се подготвиме за Фиорентина, ќе биде многу тежок натпревар. Ги имаме речиси сите играчи на располагање, па ќе видиме дали ќе го направиме вистинскиот избор“, додаде Алегри.
