Пари Сен Жермен засега не успева да постигне договор со Ајакс за ангажманот на 21-годишното крило Мика Годс, пренесува холандскиот „Телеграф“.
Според информациите, клубот од Амстердам ја одбил понудата на европскиот шампион вредна речиси 45 милиони евра за белгискиот репрезентативец. Ајакс наводно бара најмалку 60 милиони евра за неговите услуги, сметајќи дека ПСЖ, како клуб со огромна финансиска моќ, може да ја исполни таа сума. Дополнителен аргумент за Холанѓаните е тоа што францускиот гигант ова лето веќе инкасираше околу 160 милиони евра од продажба на фудбалери.
Од друга страна, ПСЖ веќе ги договорил личните услови со Годс. Двете страни имаат начелен договор за соработка до летото 2031 или 2032 година, па сега сè зависи од тоа дали парискиот клуб ќе испрати подобрена понуда. Во Амстердам очекуваат „пореална“ понуда што ќе ги задоволи нивните финансиски барања.
Младиот Белгиец имаше извонредна сезона во дресот на Ајакс, завршувајќи како најдобар стрелец на тимот со 17 голови на 44 натпревари во сите конкуренции. Покрај тоа, запиша и 15 асистенции, а новата сезона ја отвори со уште две асистенции во убедливите победи на Ајакс од 4-1 против Војводина во квалификациите за Конференциската лига.
