Фудбалската репрезентација на Македонија вечерва (20.45 часот) на Националната арена „Тодор Проески“ во Скопје го игра вториот натпревар од квалификациите за Светското првенство во Катар. По поразот (3-2) од Романија можеа да се извлечат одредени поуки, реализацијата на шансите треба да биде на многу повисоко ниво, а дел од силите треба да се сочуваат и за гостувањето против Германија во Дуисбург в среда. Со оглед дека ривал е Лихтенштајн, селекторот Игор Ангеловски може да си дозволи да направи неколку промени во составот, и да ја сочува свежината кај капитенот Горан Пандев, Илија Несторовски и кај Бобан Николов.
На нивно место во стартниот тим треба да влезат Аријан Адеми, Стефан Спировски и Александар Трајковски.
Столе Димитриевски ќе биде на голот, а нема да има промени ниту во последното трио кое ќе го сочинуваат Егзон Бејтулаи, Висар Муслиу и Кире Ристевски.
Аријан Адеми и Стефан Спировски ќе играат во средниот ред, заедно со Енис Барди, кој ќе добие многу поофанзивна улога во маневарот. На страничните позиции многу поофанзивни ќе бидат и Стефан Ристовски и Езгјан Алиоски, а во нападот овојпат ќе биде прекомандуван Елиф Елмас со слобода да креира, да доздава шанси, но и да реализира. Заедно со него во нападот треба да биде и Александар Трајковски.
Во опција секако се и Влатко Стојановски, Агим Ибраими, Даниел Аврамовски, Марјан Радески, за второто полувреме од мечот.
Македонија е апсолутен фаворит против Лихтенштајн и победата не треба да биде доведена во прашање. Сепак, ќе треба фаворитската улога да се докаже и на теренот.
