Сент Паули беше многу блиску до сензација и можеше да освои вреден бод кај фаворитот Баерн Минхен, но баварскиот гигант на крајот славеше со 3-1, благодарение на головите на Луис Диаз и Николас Џексон, кои постигнаа еден по друг во судиското надополнување.
Натпреварот од 12. коло на „Алијанц Арена“ понуди динамичен и возбудлив фудбал. Гостите поведоа уште во шестата минута преку Андреас Хунтонџи, но Баерн успеа да израмни со погодокот на Рафаел Гереиро, па на паузата резултатот беше 1-1.
Баварците долго време се мачеа да направат комплетен пресврт, но сепак покажаа зошто се апсолутен фаворит и на крајот заслужено ги освоија трите бода. За тимот на Венсан Компани, ова е 11. победа во сезоната, со што собраа вкупно 34 бода, осум повеќе од второпласираниот РБ Лајпциг.
Хофенхајм немаше проблеми на домашен терен, убедливо победувајќи го Аугсбург со 3-0. Хајденхајм во самиот финиш направи пресврт и дојде до важна победа кај Унион Берлин (1-2), додека Вердер Бремен и Келн го поделија пленот со реми 1-1.
